Duha gipangdunggab patay

CEBU, Philippines — Patay human gipangdunggab ang duha ka tawo sa managlahing higayon sa Sitio Tagaytay, Busay, Moalboal ug Pooc, Dakbayan sa Toledo niadtong Sabado sa gabii.

Sa Dakbayan sa Toledo gidunggab ang 50-anyos nga si Saturnino Fantonial sa iyang bayaw nga si Eduardo Santillan, 42, kinsa pulos residente sa maong dapit.

Base sa report sa Toledo City Police Station nga hubog si Fantonial dihang wala nagkasinabot sa iyang pag-umangkon ug iyang gigukod.

Gipugngan kini ni Santillan ug nabawi ang hinagiban gikan kang Fantonial ug dayon gidunggab sa dughan ug sa ubang parte sa iyang lawas.

Gidala pa sa tambalanan si Fantonial apan gideklarar nga dead on arrival samtang ang suspek nga si Santillan nitahan sa Toledo City Community Precinct sa Barangay DAS (Don Andres Soriano).

Sa Lungsod sa Moalboal gidunggab patay ni Segundino Requinto, 67, ang iyang niludhan sa kasal nga si Jeorge Gador, 46, silingan ra sab niya sa maong lugar.

Sumala pa sa desk officer sa Moalboal Police Station, PO1 Benjamin Ganda, nga adunay dugay na kaayong personal nga panagbangi ang duha ug giingong matag mahubog ang biktima, mosulong kini sa panimalay sa suspek.

Niadtong Sabado sa gabii, hubog si Gador nga nisulong sa panimalay ni Requinto dala ang flamingo knife.

Si Requinto nakamatikod sa dalang hinagiban ni Gador maong giunhan niya kini og dunggab gamit sab sa iyang flamingo nga kutsilyo.

Namatay diha-diha dayon gawas sa panimalay sa suspek si Gador, matud pa ni Ganda.

Kasong murder ang atubangon sa suspek. -/GMR (BANAT NEWS)