Lider sa komunista nadakpan
CEBU, Philippines – Usa ka gipasanginlang lider sa mga komunista ang nadakpan sa kapulisan human kini masakpi nga nagpatambal sa usa ka tambalanan sa Tagbilaran City sa Bohol niadtong Sabado sa kaadlawon.
Sigon sa tigpamaba sa Armed Forces of the Philippines- Central Command (AFP-CentCom) Colonel Medel Aguilar sa Banat News positibo niya nga giila ang suspetsado sa ngalan nga Pedro Lumantas, 54.
Si Lumantas nadakpan sud sa Ramiro Community Hospital nga migamit sa alyas nga Victor Penarejo.
Nasayran nga niadto pang Hunyo 14 kini nasulod sa maong tambalanan tungod kay nasamdan kini sa tiyan.
Ilaha karong gisubay kung unsay nahitabo nganong nasamdan ang maong lider sa mga rebelde. Sa pagkakaron nagpabilin kini sa tambalanan apan gibantayan sa kapolisan.
Sumala pa ni Aguilar daghan og kaso si Lumantas apil na ang kaso nga murder nga nasang-at sa Regional Trial Court Branch 47 sa Tagbilaran City miaging Oktobre 13, 2017.
Sigon ni Aguilar dako nga opisyal ug impluwensiyado si Lumantas sa ilang grupo apan nagdumili kini pagbutyag kon diin nga probinsya kini naglihok.
“Medyo malaking tao siya because he is a commander. And he is involved in so many cases,” matud pa ni Aguilar.
Dinhi sa Pilipinas way laing komunistang grupo kondili ang New People’s Army nga upat ka dekada nang nakigbatok sa gobiyerno.
Si Aguilar mipasalig sa mga Bol-anon nga walay kamatuoran ang mga estorya nga nibalik na usab ang mga NPA sa ilang lugar.
Matud niya wala nay madawat nga suporta sa komunidad ang NPA sa Bohol. Mipasalig usab si Aguilar nga dili kini mahitabo sa Sugbo.
“Hindi rin ito mangyayari basta-basta sa Cebu kasi nga paningin ko hindi papayag ang mga Cebuano, not unless magpapabaya tayo. We will always be guarding our perimeters just to make sure hindi na sila makapanggulo,” sigon pa niya. (/IBM)(BANAT NEWS)
- Latest
