TACS Expo motudlo pagtubag sa trahedya

CEBU, Philippines — Dili lang arm show apan upat ka adlaw nga training ug seminar sa survival panahon sa kalamidad ang ipahigayon sa Tactical, Survival and Arms (TACS) Expo 2018 nga gipasiugdahan sa Armscor Global Defense, Inc. sugod kagahapon hangtud sa Lunes.

Sukwahi sa ubang nibisita sa Sugbo alang sa arms show, adunay tumong ang grupo nga tabangan ang publiko sa ekipo ug kahibawo nga magamit sa mga masugatang sitwasyon, natural man o mugna sa tawo.

Sumala pa sa pangulo sa Armscor Global Defense, Inc., Martin Tuason, nga ang mga first responder sama sa Pateros Filipino-Chinese Volunteer Fire and Rescue Brigade, Inc.; Disaster and Emergency Responders International-Community Emergency Response Team (DERIN-CERT) ug si Martin Aguda sa Emergency Management Consultant ang mopahigayon sa maong seminar.

Ang kalihukan anaa sa Cebu Trade Hall sa SM City Cebu diin anaa sab ang PNP booth nga moabag sa publiko sa pagproseso sa ilang License to Own and Possess Firearm (LTOPF) nga requirement sa pagpalit og armas. (/GMR)(BANATNEWS)