Mga ilegal nga estraktura sa Lapu-Lapu gipangguba na

CEBU, Philippines — Gisugdan na kagahapon sa buntag sa kagamhanan sa dakbayan sa Lapu-Lapu ang paglarot sa mga estraktura nga gitukod diha daplin sa kabaybayonan diha sa kabarangayan sa maong siyudad.

Moabot ngadto sa 600 ka boarding house ug 60 ka piggery ang gikatakdang ipaguba nga nahimutang sa mga Barangay sa Ibo, Mactan, Buaya, Pusok ug Pajo.

Kapin sa 200 ka tawo gikan sa engineering, Clean and Green ug MRF sa Lapu-Lapu City Hall ang nagtinabangay sa pagguba sa mga estraktura  nga nahimutang diha sa kabaybayonan sa barangay Ibo, kagahapon sa buntag.

Usa sa mga tag-iya og boarding house si Hansel Felescuso kinsa napulo ka tuig nang nagpaabang nitug-an nga niadto pang adlaw nga Domingo hinay-hinay na nilang gisugdan ang pagguba sa upat ka kwartong boarding house nga sumpay sa iyang panimalay.

Dugang niya mipakita sila og suporta sa kamanduan sa siyudad tungod kay alang kini sa kaayohan sa tanan. (Romeo Limpangog/BDB)(BANATNEWS)