Del mar nakadayeg sa MCIA terminal 2

CEBU, Philippines – Gidayeg ni Kongresista Raul Del Mar ang kanindot sa bag-ong Mactan-Cebu International Airport (MCIA) Terminal 2.

Si Del Mar uban sa iyang anak nga si kanhi kongresista Rachel “Cutie” del Mar, nikuyog nilang Mactan-Cebu International Airport Authority (MCIAA) General Manager Steve Dicdican ug GMR-Megawide Cebu Airport Corporation (GMCAC) Chief Executive Advisor Andrew Harrison sa pag-inspeksiyon sa bag-ong pasilidad.

Gihulagway ni Del Mar nga “very functional” ug “classy” ang Terminal 2 nga ikatandi sa ubang nindot nga terminal sa Asia ug sa kalibutan.

Gikatakdang buksan sa publiko ang Terminal 2 karong Hunyo 7, 2018 apan sa Hunyo 22, 2018 pa sugdan ang hingpit nga operasyon niini.

Gipaabot ang pagsaka sa gidaghanon sa mga pasahero nga maokupar sa pasilidad sa dili mominus 12 milyones ka pasahero matag tuig.

Ang bag-ong terminal gamiton alang sa international passengers apan konektado ra sa daan nga Terminal 1 alang sa domestic.

Naglaum si Del Mar nga sa dili madugay mahisama sab ang Terminal 1 sa Terminal 2 nga matagamtaman sa mga domestic passengers. (Ericalene S. Tanudtanud/GMR)(BANAT NEWS)