Gidunggab sa nagselos, samaran

CEBU, Philippines — Naangol human dunggaba ang usa ka lalaki nga gidungog nga uyab-uyab sa asawa sa suspek samtang kini nag-inom kilid sa diskohan sa Barangay Subayon sa Dakbayan sa Toledo kagahapon sa kadlawon.

Ang biktima giila nga si Antonio Caliguid, 50-anyos, molupyo sa Sitio Saksak, Barangay Subayon ug buwag na sa iyang asawa. Samtang ang suspek mao si Gonzalo Nabaluna alyas “Moymoy”, 50-anyos molupyo gihapon sa maong lugar.

Matud ni SPO1 Marciano Suarez Jr., sa Toledo City Police Station nga sa ilang inisyal nga imbestigasyon, nasuta nga adunay kalagot si Nabaluna kang Caliguid kay dugay na kining gidungog-dungog sa ilang lugar nga giuyab niini ang iyang asawa.

Giingong nangita lang og tukmang higayon ang suspek ug kagahapon sa kadlawon nakahigayon gyud kini sa gawas sa diskohan samtang nag-inom ang biktima kauban sa iyang mga higala.

Asoy sa polis nga gidunggab si Caliguid gamit ang gamay nga sundang. Walay nakaulang o nakapugong sa suspek tungod sa kalit nga panghitabo.

Nakaangkon og duha ka samad dinunggaban sa iyang luyo ang biktima ug lain pang samad sa iyang abaga.  Dali kining gidala sa Toledo City Hospital apan gibalhin sa tambalanan sa Dakbayan sa Sugbo.

Samtang ang biktima nakaikyas ug hangtod karon wala pa madakpi sa kapolisan. - Kathleen Kaye G. Gonzaga, CNU Intern (BANAT NEWS)