Ginaling nga karne gikinamot gisakmit

CEBU, Philippines — Gisakmit sa taga Department of Veterinary Medicine and Fisheries ang 33 ka kilo nga ginaling sa Carbon Public Market human wala mogamit og gloves ang nagtinda niini.

Matud ni Dr. Alice Utlang, pangulo sa DVMF sa Dakbayan sa Sugbo, nga hugot ang monitoring kauban sa iyang team sa pagbantay sa mga karne nga wala mogamit og tukma nga pamaagi sa pagbaligya ilabi na kadtong dili na mahimong kaonon sa katawhan.

Atol sa pagsusi sa ilang team nasuta nga gikinamot lang ang ginaling nga karne diin dili mahimo nga mag-ukay-ukay diha sa merkado basin unya masagulan og hugaw hinungdan nga ang paghimo sa chorizo wala na sa merkado.

Ang nasakmit nga karne gisulod una sa freezer aron lutoon karong adlawa ug ipakaon sa mga iro.

Ang tag-iya sa maong karne nakamulta og P2,000 ug gidala ang mga trabahante niini sa DVMF aron tudloan kung unsay angayan buhaton aron sa sunod nga masakmitan sila og karne ang mga nagtrabaho mao nay pamultahon ug dili na ang tag-iya.

“Next time it will be the worker will be issued citation ticket and then og mausab pa gyud gani di na nato sila tagaan og license,” matud ni Utlang.

Pahimangno ni Utlang sa mga manindahay nga sundon lang unsay nalatid sa balaud aron dili sila masakmitan sa paninda ug malikayan usab nila ang pagmulta.

Nagkanayon si Utlang nga nasayud ang mga manindahay sa balaud tungod kay magpahigayon sila og seminar ug orientation matag tuig lakip na ang mga butang nga angay nilang sundon.

Apan matud niya nga adunay uban nga mosalmot sa maong kalihukan apan dili isulod sa ilang hunahuna.

Nisugyot ang tag-iya sa maong tindahan nga ilahi ang seminar ug orientation sa mga manindahay ug sa mga trabahador. (CNU Intern/GMR) (BANAT NEWS)