Wage board nitakda og public consultations
CEBU, Philippines — Niluwat na ang Regional Tripartite Wages and Productivity Board-7 og schedules alang sa public consultations kabahin sa wage hike petitions.
Matud ni Jose Tomongha, ang labor representative ngadto sa RTWPB-7, nga malaumon siya nga aduna nay bag-ong wage order sa Mayo 24 atol sa katapusang schedule sa ilang wage deliberation.
Matud ni Tomongha nga nadesisyunan sab sa mga sakop sa RTWPB-7 atol sa ilang tigum niadtong Huwebes nga i-consolidate ang duha ka wage hike petitions.
Ang duha ka wage petitions gisang-at sa Associated Labor Union-Trade Union Congress of the Philippines (ALU-TUCP) nga nangayo og usbaw nga P120 sa matag adlaw alang sa tanang pribadong mamumuo sa Central Visayas.
Ang Cebu Labor Coalition, NLM-Katipunan, Metaphil Workers Union ug Unionbank Employees Association nangayo og P155.80 nga usbaw sa suhulan matag adlaw.
Dugang pa ni Tomongha nga ang mga public consultations ipahigayon sa Dumaguete City ug Siquijor sa Abril 12; Abril 13 sa Tagbilaran City, Bohol; Abril 26 sa Cebu City; ug Mayo 10 sa Bogo City, Cebu.
Human sa public consultations, ang wage board mopahigayon og deliberasyon inig Mayo 16, 17 ug 24, 2018.
"Maybe on our May 24 deliberation, we will come up with a new wage order," dugang ni Tomongha. (GMR) (BANAT NEWS)
- Latest
