Duha gipamusil patay

CEBU, Philippines — Duha ka tawo ang gipamusil patay sa buwag nga pagpamusil dinhi sa Sugbo.

Sa Barili, usa ka barangay tanod ang gipasanginlang mipusil patay sa 24 anyos nga si Chad Salinas nga gipasanginlang nangrekrut og mga kabataan aron pasudlon sa ilang fraternity diha sa Barangay Giloctog, lungsod sa Barili. Samtang ang gitumbok nga mipusil kaniya mao si Wenello Mendoza, alyas Sito, 26, tanod sa maong barangay.

Sigun pa sa Chief Investigator sa Barili Police Station nga si SPO3 Marcel Quevedo niadtong Martes sa buntag ilang gipatawag si Salinas  kay adunay misumbong nga mga residente nga nang-recruit kini og mga bata ug diha mismo sa likod sa tunghaan nagpahigayon og hazing.

Matud pa ni Quevedo pag-uli sa biktima gisukmatan ug gihulga niini si Mendoza nga patyon kay nagduda kining maoy misumbong sa polis.

Apan pagsawop sa adlaw gisulong ni Mendoza si Salinas ug gipusil kini ug pagkahuman mitahan sa barangay kapitan kinsa midala kaniya sa kapolisan dala ang armas nga gigamit sa krimen.  Patay na pag-abot sa tambalanan ang biktima.

Samtang patay usab ang trabahante sa usa ka junkshop sa Sitio  Kagudoy, Barangay Basak  Dakbayan sa Lapu-Lapu nga si Felecisimo Castañada, 31, human gipusil og ridin-in-tandem. Si Senior Police Officer  3  Allan Pantaleon sa Homicide Section sa Lapu-Lapu City Police Office (LLCPO) miingon nga nagkarga ang biktima og scraps dihang gihunongan og motorsiklo ug gipusil sa backrider makaupat ka higayon.

Daling mipabulhot palayo ang mga mamumuno samtang gidala ang biktima sa tambalanan apan gideklarar nga dead on arrival.

Matud pa nga pipila na ka mga semana ang nakalabay may nakaaway ang biktima. Padayon karon kining gisusi sa kapolisan. (BANAT NEWS)