Magtiayon nakuryentihan, bana patay
CEBU, Philippines — Patay ang usa ka bana samtang angol ang asawa niini human silang duha nakuryentihan sa poste sa dihang nisanday sa wire ang giputol nilang kawayan diha sa Barangay Pung-ol Sibugay nga bukiran nga bahin sa Dakbayan sa Sugbo.
Ang nakalas mao si Bernabe Sibonghanoy, 46, usa ka mag-uuma, samtang ang naangol mao si Gina Sibonghanoy, 48, nga asawa sa namatay.
Matud pa ni Senior Police Officer 3 Antonio Din, imbestigador sa Homicide Section sa Cebu City Police Office, base sa pamahayag ni Julito Ardiente, nakadungog sila og sipa nga boto hinungdan nga ila kining gisusi ug didto nakita niini si Bernabe nga nagligdas sa yuta kauban ang asawa niini.
Gisuwayan dayon og tabang ni Ardiente ang duha apan nalagpot siya tungod kay aduna pa diay kuryente sa lugar.
Naabot usab sa lugar si Kapitan Jerson Cadampug ug mga tanod nga mitawag sa Emergency Response Team ug gidala sa tambalanan ang asawa kay aduna pa kini panimuot samtang ang bana nakutloan gayud sa iyang kinabuhi.
Gitug-an ni Din luwas na ang asawa apan nagpabilin kining nagpaalim sa tambalanan.
Base sa imbestigasyon namutol og kawayan si Bernabe apan disgrasya nga naigo sa giputol niining kawayan ang main line sa kuryente hinungdan nga nakuryentihan.
Si Cadampug sa iyang bahin miingon nga nakuryentihan ang ginang kay gisuwayan unta niini og tabang ang bana. (BANAT NEWS)
- Latest