Militante nagprotesta bato EJKs

CEBU, Philippines - Nagprotesta batok sa extrajudicial killings ang duha ka mga militanteng grupo sa dalan Colon atol sa Ninoy Aquino day kagahapon.

Ang Anakbayan ug Akbayan Youth nisinggit og hustisya sa pagkamatay sa 17 anyos nga si Kian Lloyd Delos Santos, usa ka estudyante sa grade 11 nga napatay sa mga polis sa Caloocan City.

Ang Cebu coordinator sa Akbayan Youth nga si Justine Balani nanawagan sa katawhan nga kinahanglang magpakabana.

Si Atty. Vincent Isles, pangulo sa Silent Majority nagkanayon adunay sakto ug sayop nga pamaagi sa pagsugpo sa druga apan ang gigamit sa administrasyon ni Presidente Rodrigo ‘Digong’ Duterte mao ang sayop. Matud niya mas angay nga tutukan ang mga dagkong durugista o mga drug lords ug dili ang mga ginagmay’ng drug pushers tungod kay biktima usab sila sa druga. Ilang gihulagway ang gubat kontra drugas ni Duterte gubat batok sa mga kabus kay kon kabus diretso rang patyon apan kon adunahan ipaagi og tinarong nga proseso pinasubay sa balaod.

Nagdagkot og kandila ang mga nagprotesta alang ni Delos Santos ug sa uban pang nangamatay sa kampanya kontra ilegal nga drugas. (BANAT NEWS)