14 nadakpan sa drug raids
CEBU, Philippines – Minor de edad nasikop atol sa buy-bust operation kagahapon didto sa District 5, Pulpogan Consolacion probinsya sa Sugbo.
Si Chief Insp. Roderick Gonzales, hepe sa Consolacion Police Station miingon nga naa sa drug watch list ang maong bata ug nitahan na kini miaging tuig apan nibalik gihapon. Matud niya pasakaan nila kini og kaso kun may rekomendasyon sa Depatment of Social Welfare and Development o DSWD human nakuhaan og tulo ka gagmay nga pakete ug medium pack nga shabu.
Samtang sa Dakbayan sa Carcar, nakuhaan og unom ka gagmay’ng pakete ug usa ka medium packs nga shabu si Jobert Candones Alcover alyas Obet, 21, taga Sitio Mahayahay, Barangay Guadalupe sa maong siyudad.
Sa Minglanilla, nadakpan silang Armod Caparas Reroma alyas Anod, 31, ug si Jerome Geonzon, 46, human nakuhaan og tagsa ka paketeng gidudahang shabu. Sa Talisay, nakuhaan og unom ka gagmay’ng pakete sa shabu silang Crisanto Yongco Ruelo alyas Cris, 44, Ramil Salvado Gabunada, 35 ug si Ramil Mahinay Secong, 38. Samtang duha ka lalaki ang naaktohang nanuyop diha sa Quijano Compound, Barangay Calamba, Cebu City nga giilang sila si Jerome Compuesto, 20, ug Antonieto Ruiz Yboña, 18, nga nakuhaan og 15 ka gagmay’ng paketeng gituohang shabu.
Sa Dakbayan sa Mandaue, nadakpan sa buy-bust operation sa Mt. Banahaw St., Barangay Tipolo sila si Arnulfo Miel, 32, Jerome Gonzaga, 28, Romy Ramas, 31, Argesa Pegarido 29, Liezl Saraum, 23, ug Jahara Peromingan, 22. Lima ka medium ug usa ka gamay’ng paketeng gidudahang shabu ug duha ka KG9 submachine pistols nga dunay mga bala ang nasakmit. Reports nilang Hazel Secop, Rhena Pizarra, CNU Interns/EIM (BANAT NEWS)
- Latest
