Nag-illegal quarry paundangon
CEBU, Philippines - Gibutyag ni kanhi konsehal Nida Cabrera ug karon consultant sa Cebu City Environment and Natural Resources Office nga hayan mo-isyu sila og Cease and Desist Order batok sa unom ka private contractor nga mihimo og illegal quarrying sa bukirang barangay sa siyudad.
Wala nganli ni Cabrera kun kinsa kining maong mga pribadong kontraktor tungod kay ipaubos pa kini og pagtuon sa Cebu City Mining Board karong Abril 27.
Matud niini, ipaubos sa pagtuon ang unom ka kontraktor human makakita og kalapasan ang siyudad kay matud pa development permit ang ilang application apan dihang gisusi nasuta nga quarry na ang ilang gihimo. Ang maong mga kontraktor giingong naghimo og illegal quarry sa Barangay Pulangbato ug Binaliw.
Gihulagway ni Cabrera nga aron mahunong ang illegal quarry, angayan nga adunay rekomendasyon nga himoon pag-amend sa Mining Ordinance sa siyudad.
Giangkon sab sa kanhi konsehal nga problema gyud sa siyudad ang illegal quarry sa kabukiran sanglit dili kanunay nga anaa sila sa lugar aron sa pag-monitor hinungdan nga mihangyo sila sa opisyales sa barangay nga mohimo niini kay sila man ang mas duol ug naa usab nila ang primary responsibility.
Nasayran nga gikan sa buwan sa Enero hangtud niining buwana, tulo na ka Cease and Desist Order ang naisyu sa siyudad nga gipirmahan ni Cebu City Mayor Tomas Osmeña. (BANAT NEWS)
- Latest
