Mananga River gisusi ni Eddiegul ug DPWH

CEBU, Philippines -  Gisusi ni Talisay City Mayor Eduardo Gullas uban sa taga Department of Public Works and Highways (DPWH) ang sapa sa Mananga.

Gitataw ni Mayor Gullas nga palawman ang maong sapa aron dili na kini muawas sa panahon nga adunay kusog nga uwan nga maoy makapeligro sa katawhan nga namuyo sa dapit.

Kahinumduman nga nasaksihan mismo sa mayor ang kahimtang sa mga residente sa lugar dihang nisuyla ang tubig sa sapa nga maoy hinungdan nga nabanlas ang upat ka panimay sa dapit ug gipabakwit ang mga namuyo.

Iyang gibutyag nga ang maong sapa nagliko-liko butang nga iyang gituohan nga dili na kini ang orihinal nga agi-anan sa tubig.

Matud ni Gullas nga palawman niya ang sapa ug han-ayon ang agianan sa tubig niini aron dili mangakankan ang mga yuta nga maagian.

Iyang gipadayag nga delikado ang kahimtang sa mga namuyo sa Gawad Kalinga tungod sa pagkaguba sa spillway gumikan sa pagtaas sa tubig sa sapa.

Si Engr. Leslie Anthony Molina sa DPWH 2nd Engineering District nitataw nga ilegal ang paghimo sa spillway kay wala kini saktong dokumento sa pagtukod. Ang naguba nga spillway maoy nakaingon nga gikankan sa tubig ang pundasyon sa mga panimay sa Gawad Kalinga.

 Siya nagkanayon nga gub-on gyud nila ang spillway aron dili mabutang sa peligro ang kinabuhi sa mga tawo nga namuyo sa dapit. Dugang pa ni Molina nga ang plano sa mayor dili imposible apan kinahanglan ang mga dokumento ug saktong kasabutan aron mahitabo ang maong laraw. Gabriel C. Bonjoc (BANAT NEWS)