Kapitan, opisyales gikiha sa PDEA-7

CEBU, Philippines - Barangay Kapitan ug mga opisyales sa Ermita sa Dakbayan sa Sugbo gipasakaan og kaso sa Philippine Drug Enforcement Agency -7 diha sa Ombudsman in the Visayas tungod sa matud pa wala pagtabang sa kampanya kontra illegal nga drugas.

Ang gikasohan mao sila si Kapitan Felicisimo Rupinta ug mga kaubanan tungod sa kalapasan sa Artikulo 233 sa Revised Penal Code ug Gross Misconduct, Gross Neglect of Duty, ug Conduct Prejudicial to the interest of the Service human matud pa wala kini manginlabot atol sa anti-illegal drug operation nga gihimo sa PDEA- 7 batuk kang Richard Cañete alyas Tata niadtong Nobiyembre 6.

Si PDEA-7 Regional Director Yogi Filemon Ruiz nga gikahinabi sa Banat News mipasangil kang Rupinta ug mga opisyales sa barangay nga wala mokooperar dihang nanghangyo sila og opisyal sa barangay aron motestigo sa ilang operasyon.

Sumala pa ni Ruiz mao pa kini ang unang higayon sa ilang mga operasyon sa dakbayan nga walay mga opisyal sa barangay nga nitambong.

Giangkon ni Ruiz nga dili matangtang sa usa ka pamilok ang problema sa drugas sa Ermita kay nakaugat na kini og maayo.

Si Rupinta sa iyang bahin nihulagway sa PDEA nga mga bakakon ug nakurat siya kun nganong gipasakaan sila og kaso nga aktibo man silang nisuporta sa mga operasyon sa kapulisan ug PDEA.

Matud ni Rupinta, atol sa maong operasyon nagpaabot ra gayud siya sa barangay hall apan way niduol kaniya. Matud niya upat ka anti-illegal drug operation nga gihimo diha sa iyang barangay siya mismo ang nibarog nga saksi.

Gitug-an ni Rupinta, adunay mga tanod ug opisyales nga niadto sa lugar apan gikatahong giabog sila sa mga ahente ug giingnan sila nga walay labot mao nga ang mga tawo na lang maoy ilang gikontrolar aron dili dugokon ang mga ahente.

Wala siya nasayod kung nganong wala makig-coordinate sa ilaha ang PDEA nga andam man gayud siya motabang matag dunay operasyon nga ipahigayon sa iyang barangay.

Sa iyang bahin si Cebu City Mayor Tomas Osmeña wala mohatag og daghang kumento labot niini, apan siya mitug-an nga daghang barangay officials ang wala magpakabana ug ang uban protector sa ilegal nga drugas.

Dili motuo si Osmeña sa pangangkon nga wa masayod ang kapitan sa mga ilegal nga kalihukan sa iyang dapit.

“All you have to do is look at the barangay, (what) the activities are and find out who’s the barangay captain, it’s impossible for the barangay captain to say I don’t know what’s going on of course you know what’s going on, it’s your barangay,” matud ni Osmeña.

Gihulagway ni Mayor Osmeña nga kun dunay kwarta nga nalambigit dili gyud kalikayan nga naay mga government officials, kapulisan, barangay officials ang dili gyud makabalibad.

Alang kaniya husto ang gibuhat sa PDEA nga kasohan dayon ang mga barangay officials nga dili mokooperar sa mga otoridad batok sa illegal nga drugas. Rowena Capistrano ug Decemay P. Padilla (BANAT NEWS)