Anti-dengue ordinance aprubahan sa Talisay

CEBU, Philippines - Naglaraw si City of Talisay Councilor Richard Aznar nga ilang maaprubahan ang Anti-Dengue Task Force sunod semana aron mapahingusgan ang ilang kampanya batok dengue.

Si Konsehal Aznar nga maoy chairman sa Committee on Health niingon nga ang Talisay usa sa mga lugar nga adunay daghang lamok nga nagdala og dengue hinungdan nga naa sa ikawalo nga pwesto sa tibuok lalawigan nga adunay labing daghang kaso sa dengue.

Matud sa konsehal nga ang pag-aprubar sa ordinansa mao sab ang paglihok og balik sa Dengue Task Force nga napasagdan sa niaging administrasyon.

Subay niini, ilang awhagon ang tanang establisemento sa dakbayan nga mopuhag sa mga lugar nga pwedeng pangitlogan sa mga lamok nga nagdala og sakit.  Giawhag sab niya ang mga tunghaan sa pagpabilin sa ilang gihimong “4 o’clock habit” ug ang search and destroy operation.

Dugang sa konsehal nga kun mapasar na ang maong ordinansa, mahimo nang makamulta ang residente nga dili motuman sa lagda sa pagpatay sa mga lamok.

Samtang si Dr. Lino Alanzado, ang City Health Officer nibutyag nga ilang hangyuon ang mayor sa pagkuha og 20 ka lalaking personnel nga pwedeng bansayon sa pagpuhag sa mga lamok.

 Sa pagkakaron, ang Talisay nakatala na og 300 kapin nga kaso sa dengue. (BANAT NEWS)