Pusher, drug den caretaker patay

CEBU, Philippines - Patay ang tigpayuhot og ilegal nga drugas apil ang drug den operator human sila gikatahong misukol sa kapulisan sa Dakbayan sa Talisay atol sa buy-bust operation diha sa Sitio Tunga, Barangay Tanke niadtong Miyerkules sa gabii.

Ang duha nga napatay gipaubos na sa Oplan Tukhang nailhan nga sila si Junrey Verbesada alyas Negro ug Pla-Pla Calapaz pulos nagpuyo sa nahisgutang lugar.

Si Supt. Aileen Recla, pangu sa kapulisan sa dakbayan nitug-an nga nakadawat sila og tawag gikan sa mga silingan sa duha nga nagpahibawo nga way kahadlok ang duha pagpamaligya og drugas sa ilang lugar kay display na kaayo.

Tungod niini, ilang giporma ang usa ka operasyon ug ang puntariya mao si Verbesada kinsa notadong drug pusher sa lugar. Diha usab sa drug den nga gipadagan ni Calapaz giingong suyopon sa mga customer ni Verbesada ang shabu nga mapalit kaniya.

Sumala pa nga napalitan og shabu ang duha apan nakabantay sila nga polis diay ang nipalit kanila ug dalidaling niibot sa ilang mga armas apan padung pa lang sila motion gi-unhan na sila sa mga polis.

Gisuwayan sa pagdala sa Talisay City District Hospital ang duha apan gideklarar kini ni Dr. Khaibar Angsa nga dead on arrival.

 “Mao na’y atong gi-instruct sa atong mga tawo nga basta mobunot unhan na lang gyud,” nagkanayon si Recla.

Nakuha gikan sa duha ang 28 ka tag-as nga paketeng may sud nga gidudahang shabu ug duha ka .38 nga revolver nga pulos puno sa mga bala.

Si Recla miingon nga taud-taod na nilang nadungog ang mga pangalan sa duha ug gani apil sila sa gipaubos sa Oplan Tukhang apan namalik gihapon pagpamaligya og shabu.

Dugang pa ni Recla nga daghan pa unyang himuong operasyon sa maong lugar tungod kay daghan paman nga dagkong ‘players’ sa maong barangay nga padayong namaligya og shabu.  (BANAT NEWS)