Middleman sa hitman

CEBU, Philippines - Nadakpan na sa kapulisan sa Dakbayan sa Sugbo ang gitumbok nga “middleman” sa pagpatay sa usa ka pastor diha sa Brgy. Bonbon ning Dakbayan, pipila ka adlaw na ang nakalabay.

Si Garry Daclan, nagpuyo sa Sitio Biasong, Brgy. Bonbon ang nadakpan sa kapulisan human sa follow-up operation diha sa Brgy. Guadalupe.

Matud pa ni Supt. George Ylanan ang Deputy City Director for Operations sa Cebu City Police Office unang nadakpan sa mga sakop sa City Anti-Illegal Drugs Special Operations Task Group sa CCPO ang igsuon ni Daclan nga si Gilbert ug ang kapuyo niining si Roxan Catanbacan niadtong nakalabay nga          hapon.

Atol sa maong hitabo nakaikyas si Garry kay nakabantay kini sa mga polis human kini mitubag sa sugo sa lawas sa may sapa.

Gitug-an ni Ylanan nga atol sa maong hitabo nakigpinusilay pa sa mga polis si Garry hangtod nga nakasibat nga nagsuot lang og brief dayon nakasakay sa usa ka habal-habal.

Si Garry nga nahinabi sa mga tigbalita miingon nga igo lang kini gisugo sa iyang agalon nga anaa karon napriso sa Muntinlupa nga usa ka “Ramil Bontuyan” nga pabirahan ang biktima nga si Crisostomo Maternal Jr., nga usa ka pastor sa Baptist.

Matud pa tungod kay nakit-an kini nga adunay kauban nga mga sundalo nga sa ilang pagduda dunay himuon nga drug raid sa ilang dapit, apan diay naghimo lang kini sa “Brigada Eskuwela” sa maong barangay.

Sumala pa niini nga P30 mil ang gibayad nila sa gunman nga iyang gikuha aron tumbahon ang pastor, matud pa niya nagbasol siya niini.

Giangkon sab niya nga nagbaligya sab kini og drugas apan ginagmay lang.

Sa pagkakaron ang kapulisan padayon nga nangita sa gunman sa maong krimen, apan si Ylanan mibutyag nga aduna na sila’y kompletong pangalan niini ingon man hulagway. Kagahapon, gipahalipayan ni Cebu City incoming Mayor Tomas Osmeña ang kapolisan pagkasikop kang Daclan.

Si Maternal, coordinator sa Community Investigative Support (CIS) nga maoy civilian volunteer group sa PNP Criminal Investigation and Detection Group (CIDG), gikatahapan nga maoy responsable sa paghatag og kasayuran sa mga polis kabahin sa mga pagpangronda sa mga drug personality sa bukid.

Usa ka giilang drug pusher sa Barangay Sudlon II, dakbayan sa Sugbo ang napatay sa mga polis mga duha ka semana na ang nakalabay tungod kay misukol kini atol sa raid.

Si Superintendent Michael Anthony Bastes, hepe sa Cebu City Police Office (CCPO) Criminal Investigation Branch, wala moila sa gunman nga gitug-an kanila sa dinakpan nga si Daclan kay nagpadayon pa sila sa pagpangita kaniya.

Si Osmeña miingon nga dili niya premyohan og salapi ang mga nakadakop kang Daclan kay wala man kini mapatay ug wala mapusili nga maoy iyang basehanan sa paghatag kanila og pahalipay.

Tag P50 mil ang ihatag ni Osmeña sa mga polis nga makapatay og drug pusher ug ubang badlongon sa katilingban samtang P5 mil lang kun igo lang maangol. (BANAT NEWS)