2 babaye, bata nadakpan tungod sa drugas

CEBU, Philippines - Nasikop sa kapolisan ang upat ka tawo lakip na sa usa ka menor de edad nga lalaki sa buy-bust operation sa miaging gabii sa Brgy. Poblacion lungsod sa Cordova. Target unta sa maong operasyon si Joseph Tiro Rosani ,29, nga gidudahang drug pusher apan nakaikyas.

Nadakpan hinuon sila si Franklyn Tecson, 24; Ricky Obregon, 26; Sherwin Membrillos ,19, ug ang usa ka 17-anyos nga lalaki nga naatlan sa kapolisan sa sulod sa balay ni Rosani.

Si Police Officer 3 Richie Gapo miingon nga ang suspek usa ka level three drug pusher nga makabaligya og di mominos 20 gramos matag semana.

Nakabantay kini nga nagpadulong ang mga polis ug dali nga nigawas sa iyang balay ug wa na maabti sa kapolisan.

Nakuha gikan sa balay sa suspek ang pito ka gamay nga pakete, duha ka medium sized, drug paraphernalia ug ang buy-bust money.

Samtang nasikop sa kapulisan sa Pinamungajan Police Station si Vanessa Añasco, 24, nga gipasanginlang drug pusher diha sa Brgy. Lamac atol sa gipahigayong buy-bust operation nga gipangulohan ni Police Inspector Gilfred Baroman.

Matud pa napalitan kini og P200  nga shabu  maong kini gidakop ug nakuhaan og dugang unom ka gagmay nga putos sa gidudahang shabu ug ang buy-bust money.

Nadakpan usab sa mga polis sa Lungsod sa Consolacion ang usa ka  Ninee Perez, 23, nga taga Brgy. Tipolo, Dakbayan sa Mandaue human kini unang gireklamo nga nisuway og kawat sa acetylene torch handle sa usa ka Angelito Pasaol diha sa Poblacion-Oriental.

Sumala pa ni Police Officer 1 Socrates Borinaga dihang nadala na sa ilang buhatan ang suspek nasakpan kining adunay gilugpitan nga usa ka gamay nga paketeng shabu ug tinfoil sa taliwala sa iyang lapalapa ug sandals.

Laing nadakpan diha sa Brgy. Pulpogan ang usa ka Isidro Barrio,47,tungod sa pagpamaligya og shabu. Matud pa nga target unta sa kapolisan ang usa ka William Maglasang nga giingong notadong tigpayuhot og drugas sa dapit.

Apan atol sa operasyon nakamatikod kini ug daling nidagan apan si Barrio lang ang ilang nakuptan. (BANAT NEWS)