2 motor nisampak sa trak, 2 drayber patay

CEBU, Philippines - Nakabsan sa kinabuhi ang duha ka drayber sa motorsiklo human sa managlahi’ng disgrasya sa kadalanan sa Probinsya sa Sugbo sa nakalabay nga adlaw.

Alas 11:30 sa buntag sa Banhigan, Lungsod sa Badian, patay ang usa ka James Curaza, 40-anyos, ug naangol ang iyang backrider nga si Armando Fabillar, 22, pulos taga Barangay Bato sa maong lungsod, human nisampak ang ilang gisakyang motor sa usa ka Isuzu Elf sa kurbadahong dalan.

Ang drayber sa Isuzu Elf naila nga si Noel Pepito, 26, taga Subangdaku, Dakbayan sa Mandaue.

Sumala pa ni Police Officer 3 Jonathan Calabroso, desk officer sa Badian Police Station, nga paingon sa Dakbayan sa Sugbo ang Isuzu Elf samtang paingon usab sa Alegria ang mga biktima.

Gibuhian ra sa kapolisan ang drayber sa Isuzu Elf human nagkasinabot ra usab ang drayber ug ang pamilya sa biktima.

Samtang sa Lungsod sa Minglanilla, patay usab ang drayber sa motorsiklo human napasok sa usa ka dump truck sa Barangay Calajo-an pasado alas 3 sa nakalabay nga hapon.

Ang drayber sa motorsiklo giila nga si Calvin Aljas, 29, taga Upper South, Tinaan, Dakbayan sa Naga samtang ang drayber sa dump truck mao si Ed Lim, 34, molupyo sa mao’ng dakbayan.

Matud ni Police Officer 3 Vincent Aliñabo, desk officer sa Minglanilla Police Station, nabanggaan sa motorsiklo ang likod nga bahin sa dump truck hangtud nga nawad-an og kontrol ang drayber ug napasok sa ilawom.

Patay diha-diha ang drayber sa motorsiklo samtang nitahan usab sa kapolisan ang drayber sa dump truck.

Si Aliñabo niingon nga duna na’y inisyal nga gikasabutan ang duha ka partidos nga dili na mopasaka pa og kaso ang pamilya sa namatay ug karong adlawa gikatakdang buhian usab sa kapolisan ang drayber sa dump truck. (BANAT NEWS)