Mga politiko wa papiri
CEBU, Philippines - Nagpakita sa katawhan nga nanan-aw sa Sinulog kagahapon ang pipila ka mga nasudnong kandidato sa umaabot eleksiyon karong Mayo nga gipangulohan ni Bise Presidente Jejomar Binay.
Si Binay ug kaubanan kuyog ni Mayor Michael Rama, ang overall chairman sa Sinulog, ug Bise Gobernador Agnes Magpale sa Cebu City Sports Center sugod sa pagbukas sa kalihukan ug nibiya pasado alas 11 sa buntag.
"I am so happy to be back for my panata," matud ni Binay kinsa nakatambong na og upat ka Sinulog. Apan sa pagtimbaya ni Binay sa mga tawo diha sa entablado og “Maayong buntag sa inyong tanan, Viva Pit Senyor!” gi-boohan siya sa mga tawo.
Dihang gipangutana siya bahin niini, matud niya wala siya makadungog, bisan si Rama miingon nga wa siya makadungog apan siya miingon nga posibleng bunga lang kini sa kainit sa politika karon. Ang hepe sa media affairs ni Binay nga si Joey Salgado miingon girespetohan lang unta bisan nalang ang okasyon.
Kuyog kaniya ang kaubanan sa United Nationalist Alliance nga sila si Senador Gringo Honasan nga kandidato sa pagka-bise presidente, ug mga senatoriables nga sila si actress Alma Moreno, Princess Jaycil Kiram, broadcaster Rey Langit ug kanhi Special Action Force chief Getulio Napeñas.
Samtang ang mga senatoriables sa Liberal Party nga sila si Joel Villanueva, Risa Hontiveros ug Leila de Lima kuyog sa contingent sa Probinsiya sa Sugbo. Si kanhi Senador Richard Gordon niingon nga 80 porsiyento sa Sinulog grand parade ang iya’ng nalibot ug naobserbaran ang ka baga sa katawhan apan hapsay ang palibot.
Si Gordon, chairman sa Philippine Red Cross, nipahibawo nga nagbutang sila og walo ka Red Cross stations, ambulansiya ug kapin sa 250 ka first aiders nga moatiman sa mga emerhensiya. Alas 10 pa lang sa buntag, 600 na ka tawo ang nipaubos sa blood pressure check-up ug 15 ang gidala sa hospital sa iya’ng mga sakop. (Gikan sa The Freeman/GMR) (BANAT NEWS)
- Latest
