Wa mangagda og inom gipatay

CEBU, Philippines – Tungod lang kay wala mangagda og inom, gipatay sa duha ka lalaki ang ilang silingan nga mangihaway og baboy diha sa Sitio Mananga 2, Barangay Tabunok, dakbayan sa Talisay niadtong miaging gabii. Ang biktima mao si Reggie Lambo, 42, nagpuyo sa nahisgutang lugar.

Samtang ang mga suspek mao sila si Roger Jemenez ug Jonalou Cabrera.

Si PO3 Jason Del Campo sa Talisay City Police nagkanayon nga naa sulod sa ilang panimay ang biktima sa dihang kalit nga nanulod ang duha ka mga suspetsado ug gipusil kini sa dughan.

Ang mga suspetsado ang dali nga nisibat human sa pagpamusil samtang ang biktima gidala sa Talisay City District Hospital apan gibalhin kini sa Don Vicente Sotto Memorial Medical Center. Matud ni Del Campo nga ang kapuyo sa biktima maoy nipahibawo kanila nga nakabsan gyud sa iyang kinabuhi ang biktima.

Sumala pa nga niadtong miaging mga adlaw daghan og kwarta ang biktima tungod kay daghan man kini nga giihaw nga baboy ug nagdala kini og daghang ginhawaan nga gisumsoman samtang nag-inom uban sa iyang mga higala.

Matud pa ni Del Campo nasuya ang mga suspek kay wala agdaha sa biktima. – /EIM) (BANAT NEWS)