Kaparian di padapigon og politico
CEBU, Philippines – Giklaro ni Cebu Archbishop Jose Palma nga non-partisan ang Simbahan dungan sa pagpahimangno sa kaparian nga dili mopahigayon og misa alang sa propaganda sa usa ka politiko.
Una na’ng gitambagan ni Manila Archbishop Luis Antonio Cardinal Tagle ang kaparian nga dili modawat og mga imbitasyon labot sa pagpahigayon og misa sa usa ka political ug campaign events.
Matud ni Palma nga dili angayang mo-endorso ug mokampanya ang usa ka pari og kandidato tungod kay supak kini sa universal rule sa Simbahan isip usa ka non-partisan nga institusyon.
Hinuon, kun dili gyud malikayan, kinahanglan nga patas ang himuong pagtratar sa usa ka pari sa mga politiko ug kun moselebrar na kini og misa sa usa ka politiko, kinahanglan nga dili balibaran ang imbitasyon sa uban aron dili madudahan nga dunay gipaburan.
Kung adunay balibaran, kinahanglan nga balibaran na sab sa usa ka pari ang ubang imbitasyon aron pagpakita nga non-partisan ang Simbahan.
Samtang gitug-an ni Palma nga si Bishop Dennis Villarojo, secretary-general sa International Eucharistic Congress 2016, ang nihimo na og pastoral letter nga adunay sama’ng unod nga nagdili sa mga politiko nga mopapel sa mga kalihukan sa IEC.
Gi-discourage ni Palma ang kaparian sa Archdiocese sa Sugbo sa pag-apil-apil sa mga kalihukan may kalabutan sa politika ilabi na inig abot sa panahon sa kampanya.
Kini nunot sa naandan na sa mga kandidato nga sugdan ang kampanya pinaagi sa pagpahigayon sa Santos nga Misa ug pagbendisyon sa mga campaign materials. Gipadayag ni Palma nga aduna na’y mga giya nga ipaguwa unya ang Archdiocese of Cebu ngadto sa kaparian nga ila’ng tamdanan ilabi na sa nagsingabot nga eleksyon.
Giawhag usab sa Arsobispo ang tanang kandidato nga respetuhon ang kabalaan sa sulod sa simbahan. (BANAT NEWS)
- Latest