Gipatay sulod sa payag

CEBU, Philippines - Patay ang usa ka tawo kinsa gisaka ug gidunggab sulod sa gipuy-an niini’ng payag sa Purok Mango, Barangay Sac-on, Lungsod sa Carmen alas 8 pasado sa buntag niadto’ng Domingo.

Si Police Officer 3 Jerome Quimque sa Carmen Police Station niila sa biktima nga si Sonny Boy Espina, 26-anyos, nga nagpuyo sa mao’ng dapit.

Matud ni Quimque nga nagsaulog sa tinuig nga pangilin ang mao’ng dapit ug nasigpatan sa mga silingan sayo pa sa hapon sa mao’ng adlaw nga nag-inusara lang ang biktima nga nag-inom og ilimnong makahubog sulod sa gipuy-an niini’ng payag hangtud nga nahinanok og katulog.

Nahingangha na lang ang pipila ka silingan sa biktima diha’ng nahiagi kini sa payag alas 8 pasado sa buntag nga nagbuy-od na kini nga patay na ug nagkadugo.

Dugang ni Quimque nga dali nga nipahibalo sa ila’ng buhatan ang mga silingan sa biktima ug base sa kahimtang sa patay’ng lawas diha’ng ila’ng gihimo ang pakisusi, mao’y ilang pagtuo nga nahitabo ang pagpatay alas 12 pasado pa ang takna sa niagi’ng tungang gabii.

Nakabaton og mga samad dinunggaban sa dughan ug uban pa’ng bahin sa lawas sa biktima hinungdan sa hinanali niini’ng kamatayon. (BANAT NEWS)