Office of the Mayor ukopahon ni Labella?

CEBU, Philippines – Si suspended mayor Michael Rama mitataw nga tukma ang gihimo ni Acting Cebu City Mayor Edgardo Labella nga wala mogamit sa Office of the Mayor tungod kay dili dumalayon ang iyang pagkasuspenso.

Ang pamahayag ni Rama iyang giluwatan tungod kay adunay mga konsehal nga alyado sa Bando Osmeña Pundok-Kauswagan (BOPK) nga nag-awhag kang Labella nga adto na mag-opisina sa Office of the Mayor.

Kini aron nga si Konsehal Nestor Archival nga gimandoan nga mo-asumer pagka acting vice mayor sa dakbayan sa Sugbo, adto usab mag-opisina sa Vice Mayor’s Office.

Matud ni Rama nga bisan gani siya kaniadto nga dugay kaayo siya nga milingkod isip acting mayor sa dakbayan dihang nagpatambal si kanhi mayor Tomas Osmeña didto sa Estados Unidos, didto ra gyud siya mag-opisina sa Vice Mayor’s Office.

Si Rama gi-preventive suspension sa Malacañang bali’g duha ka buwan samtang magpadayon ang imbestigasyon sa kaso nga grave abuse of authority nga gipasaka sa kapitan sa Barangay Labangon.

Kini may kalabotan sa pagpaguba ni Mayor Rama sa median structure nga gitukod taliwala sa Katipunan Street nga gihulagway ni Rama ug sa DPWH nga traffic hazard.  (BANAT NEWS)