Manual sa CPDRC wa nagamit

CEBU, Philippines - Nasurpresa ang mga sakop sa Hunta Probinsyal human nasayri nga wala’y manual ang Cebu Provincial Detention and Rehabilitation Center.

Sila si CPDRC acting Warden Romeo Manansala ug jail consultant Marco Toral ang gipatawag sa PB kagahapon aron pagpatin-aw sa nahitabo sa piniriso nga si Bienvinido Noel alyas John Reyes nga gipagawas sa prisohan nga wala’y court order gumikan sa injury sa pagduwa og basketball.

Nabalaka si Bokal Arleigh Sitoy nga ang mga opisyal sa CPDRC mag-atubang og kaso sa pagpagawas sa mao’ng piniriso.

Apan si Manansala niklaro nga emergency ang nahitabo kang Noel hinungdan nga gidali pagdala sa pribado’ng tambalanan human usab nakita ni Toral nga nagping-it na sa kasakit sa tiil nga daw nakuyapan ang piniriso.

Ang doktor sa Cebu Doctor’s Hospital nga si Dr. Camilo Arenajo kinsa gidapit usab sa PB ang wala nakatunga sa sesyon kagahapon.

Gibarugan ni Manansala ug Toral nga wala sila’y nalapas nga balaud sanglit kadto’ng panahona usa ka emergency samtang wala’y doktor atol sa hitabo mga alas 9 na sa gabii.

Samtang si Bokal Sun Shimura niingon nga taudtaud na nga wala natagad ang manual sa CPDRC nga gihan-ay ni kanhi bokal Jose Maria Gastardo.

Giawhag ni Shimura ang secretary sa Sangguniang Panlalawigan nga ukayon ang record labot sa mao’ng manual.

Gisugyot sab ni Bokal Christopher Baricuatro nga kinahanglang on-call ang doktor ug nurse sa CPDRC aron mao’y motan-aw kung gikinahanglan ba nga dad-on sa hospital ang usa ka piniriso nga makasugat og emergency.

Si Toral nipahibawo sa PB nga may balaud sa United Nations Rules on Detainess/Prisoners nga makonsiderar ang emergency ug humanitarian reason sa mga piniriso. (Renan Alangilan/GMR)(BANAT NEWS)