Mga kababayen-an gipasidunggan
CEBU, Philippines – Gihatagan og pasidungog ang nagkadaiyang kahugpongan sa kababayen-an gikan sa 27 ka barangay sa Dakbayan sa Mandaue tungod sa mga programa nga ilang naumol ug nahimong panginabuhian.
Ang paghatag og pasidungog natigayon atol sa gihimong Women Summit niadtong miaging adlaw nga gipahigayon sa Mandaue City Cultural and Sports Complex sa Sitio Tribunal sa Barangay Centro sa maong dakbayan.
Ang Barangay Paknaan maoy nakadawat og pasidungog isip “Most Gender Responsive Barangay,” ug nadawat nila ang ganti nga P100,000.
Nunot niini si Paknaan Barangay Kapitan Malaquias Soco miingon nga kanunay gayud niyang gikonsulta ang kababayen-an labot sa maong ganti nga ilang nadawat alang sa proyekto nga ilang pagahimuon.
Dugang pa ni Soco gipakuha nila og technical vocational skills nga naglakip sa cosmetology, baking, cooking, dressmaking, welding ug uban pa ang kababayen-an.
Nunot ang mga opisyal sa Mandaue Chamber of Commerce and Industry (MCCI) sanglit mahimo man silang kaabag sa pasiugdahang panginabuhian sa grupo sa kababayen-an nga naglambigit sa manufacturing business ug uban pa.
Ang Barangay Ibabao Estancia maoy ikaduhang mananaug ug nakadawat usab kini og P70 mil nga ganti, Barangay Cambaro nga maoy ikatulo ang nakadawat og P50 mil, ikaupat ang Barangay Tabok nga nakadawat og P20 mil, Barangay Canduman ang nakadawat og P20 mil samtang ang wala modaug ang nakadawat usab og plaque of appreciation. – /EIM) (BANAT NEWS)
- Latest