Nanghulga og 2 ka bata gidakop

CEBU, Philippines – Gidakop sa mga sakop sa PNP Regional Public Safety Battalion-7 ang usa ka lalaki nga gipasanginlang nanagpa ug misuway’g dunggab sa usa ka bata’ng lalaki ug mibahad sa usa ka dalagita nga iyang patyon didto sa Barangay Anonang Norte, dakbayan sa Bogo.

Gibilanggo karon sa Bogo City Police Station si Raul Polo, 47, ug hayan pasakaan kini og kaso tungod sa pag-abuso niya sa duha ka batan-on.

Si Polo gipasanginlan nga misagpa sa 16-anyos nga lalaki pipila ka higayon ug mihulga nga iya kining dunggabon dungan sa pagbunot og kutsilyo.

Ang bata nakamaneho sa pag-ikyas apan gigukod gihapon ni Polo. Sa unahan nakit-an sa suspek ang 10-anyos nga batang babaye nga nag-galing og mais duol sa ilang balay ug mao na sab kini ang iyang gisita ug gihulga nga dunggabon sa walay igong hinungdan.

Ang mga ginikanan sa duha ka bata nangayo’g tabang sa kapolisan ug ang mga sakop sa RPSB nga nagpatrolya sa maong lugar midakop sa suspek nga nagbitbit pa gihapon og kutsilyo.  (BANAT NEWS)