Nanigbas og polis napusilan patay

CEBU, Philippines - Patay nang nalandig sa tambalanan ang usa ka 35 anyos nga lalaki nga nanghagis dala ang sundang human napusilan sa polis nga iyang gitigbas diha sa Barangay Santa Cruz lungsod sa Ronda.

Ang napusilan patay mao si Jolito Marabilles, nagpuyo sa maong dapit, samtang ang polis nga nakapusil mao si Police Officer 2 Virgilio Villamor sakop sa Ronda Police Station.

Matud pa ni Police Officer 3 Joselito De Aquino ang desk officer sa Ronda Police nga nahinabi sa Banat News adunay nanawag kanila ug nipahibalo nga adunay nanghagis ug gipamutlan og ulo ang mga manok hiniktan ug gipanggukod kutob sa tawong makit-an. Unang miresponde ang tulo ka polis apan nangayo sila og backup human gibato sila ni Marabilles nga wala mopatuo.

Ang mga paryente ni Marabilles apil sa mipakalma kaniya apan wala gihapon kini mipatuo ug gitigbas si Villamor maong napusilan kini sa tiil.

Imbes nga motahan, miatraka hinuon kini hinungdan nga giusban siya pagpusil sa tiyan. Dali unta kining gidala sa Barili District Hospital apan nakabsan gayud kini sa kinabuhi.

Narekober sa kapulisan ang 15 pulgadas nga sundang nga gigamit sa suspetsado.  Si De Aquino miingon nga nagtrabaho kaniadto sa Cebu City si Marabilles apan sa dihang  nabalik kini sa ilaha nabantayan nga nausab na ang dagan sa iyang pangisip.  (BANAT NEWS)