Pasangil batok sa mga polis bahin sa siomai ipasusi sa PCAC

CEBU, Philippines – Giawhag ni Cebu City Vice Mayor Edgardo Labella ang kadagkoan sa Cebu City Police Office (CCPO) paghimo og imbestigasyon kalabot sa nigawas nga viral post diha sa Facebook nga gipasanginlan ang tulo ka polis nga wala namayad sa gikaon nga siomai sa usa ka siomai vendor diha sa dalan Colon.

Lakip sa buot ipasusi ni Labella ang mga pagduda nga nahulga ang vendor nga si Renante Batucan mao nga mihimakak kini sa gi-post sa usa ka concerned citizen diha sa Facebook.

Si Batucan dihang nahinabi sa mga tigbalita diha sa Waterfront Police Station miingon nga mipatim-aw siya aron limpyohan ang mga pangalan sa mga polis nga sila si Police Officer 1 Policarpio Barliso, Police Officer 2 Jonathan Cabañero ug Police Officer 2 Lolito Bustria. Ang tulo nag-viral sa social media tungod sa matud pa wala nila pagbayad sa gikaong siomai nga baligya ni Batucan. Si Batucan matud pa   nagbagulbol sa gibuhat sa maong mga polis, apan niadtong miaging adlaw mihimakak nga nagbagulbol siya ug miingon nga ‘suki’ niya ang maong mga polis.

Tungod sa paglimpyo ni Batucan sa maong mga polis, mibahad ang hepe sa Waterfront Police Station nga si Chief Insp. Jose Gesto nga ilang ikiha ang nag-post sa Facebook. Ang maong Facebook account sa netizen gi-deactivate na sa tag-iya human nagbuto-buto sa media ang iyang gi-post ug gituohang nahadlok kini sa iyang seguridad.

Apan buot ni Labella nga imbestigahan kini sa CCPO.  Ang pangulo sa Police Coordinating and Advisory Council (PCAC) Engr. Eugene Elizalde nagkanayon nga karong umaabot nga PCAC meeting ila kining tukion. (BANAT NEWS)