Health stations ibutang sa mga sam-ang

CEBU, Philippines – Gipasalig sa pangulo sa Cebu City Health Department, Dr. Daisy Villa, nga adunay madangpan ang katawhan sa higayon nga may pamation sa kalawasan atol sa pagbisita sa mga sam-ang.

Matud ni Villa nga aduna sila’y lima ka stations nga naglangkub sa Calamba Cemetery, Carreta Cemetery, Pardo Cemetery, Cempark ug Queen City Memorial Garden diin adunay mga doctor ug sakop sa Emergency Medical Services nga standby aron dali ra makatubag kung may emerhensiya.

Samtang ang director sa Department of Health-7, Dr. Jaime Bernadas, nanawagan sa katawhan ilabi na sa katigulangan ug kabataan nga dili na lang moadto sa mga sam-ang tungod kay risgo sila sa mga sakit-sakit gumikan sa kadaghan sa tawo. Giawhag usab ni Bernadas ang mga sanitary inspectors sa pag-regulate sa mga manindahay sa sementeryo nga siguruhon ang pag-preparar sa pagkaon ug nga aduna sila’y health certificate nga gihuptan.

Samtang sakmiton sa kapolisan ang mga mahait nga hinabigan ug ang ilimnong makahubog nga dad-on sa pagsulod sa mga sementeryo.

Si Senior Superintendent Mariano Natuel Jr. direktor sa Mandaue City Police Office (MCPO), niingon nga kini aron pagseguro sa kahapsay ug kalinaw sulod sa sementeryo.

Gawas sa kapolisan, moabag usab ang mga tanod nga mobantay sa mga tawo.

Ang mga sakop sa Traffic Enforcement Agency of Mandaue (TEAM) ang mopatuman usab sa kahapsay sa kadalanan. Samtang gipahimutang usab sa bus terminal sa dakbayan sa Toledo ang police assistance desk ug sa pantalan alang sa mga pasahero nga mopauli paingon sa San Carlos City ug sa ubang bahin sa Negros Island Region.

Ang City Health Office sa Toledo nagbutang usab og doktor ug nurse alang sa medikal nga panginahanglan sa mga pasahero.

Ang pagpatuman og seguridad sa mga pantalan ug bus terminal molungtad hangtud pa sa Nobiyembre 3 atol sa pagpamalik sa mga pasahero.  (BANAT NEWS)