Manny Pacquiao mag-senador

CEBU, Philippines – Pormal na nga nideklarar si Pinoy ring superstar, Kongresista Emmanuel “Manny” Pacquiao, nga mopapili sa pagka-senador sa umaabot nga bugno’ng lugaynon karong Mayo 2016.

Gipahibawo ni Pacquiao ang iyang desisyon atol sa panagtigum sa People’s Champ Movement (PCM) niadto’ng Lunes sa gabii sa Family Country Hotel sa General Santos City diin gitambongan og kapin sa usa ka libo ka mga opisyal ug sakop sa pundok nga gitukod mismo ni Pacman niadto’ng tuig 2010.

“I would like to inform you that I’m running for senator this coming 2016 election. Whatever I did in my district in Sarangani, I would try to duplicate it in the whole country once I get elected,” matud ni Pacquiao sigun sa taho sa iya’ng publicist nga si Aquiles Z. Zonio nga napatik sa philboxing.com.

Wala pa hinuon makahukom ang eight-division world champion kung unsa’ng partido siya magpasakop apan iya na’ng gipadayag sa sayo pa nga kun ugali’ng modesider si Davao City Mayor Rodrigo 'Digong" Duterte nga modagan sa pagka-Presidente, hayan nga mao kini ang iya’ng suportahan.

Si Duterte nisaad na’ng daan nga madayun man siya og dagan o dili, segurado na’ng iya’ng paluyohan ang bag-ong dalan nga baktason ni Pacman sa natad sa politika.

Ang Liberal Party ubos sa liderato ni Presidente Noynoy Aquino hugtanong niawhag ni Pacquiao nga moapil sa ila’ng linyada. Gani sila si LP presidential candidate Mar Roxas ug ang laing emisaryo sa LP nga si Caloocan Rep. Edgar Erice nakighimamat ni Pacquiao duha ka higayun apan wala pa kini mokubit sa ila’ng tanyag.

Kahinumduman nga si Pacquiao nihimo og alyansa uban sa United Nationalist Alliance (UNA) ni Bise Presidente Jejomar Binay atol sa eleksiyon niadto’ng 2013 apan hangtud karon wala pa siya nipadayag sa intensiyon kung magpabilin pa siya sa poder ni Binay.

Sa niagi lang semana, si kanhi senador Juan Miguel Zubiri nibisita ni Pacquiao sa panimaye niini sa Forbes Park sa Makati aron kumbinsihon nga modagan sila isip mga independente.

Sa gihapon, si Pacquiao tak-om ang baba kabahin sa kun unsa’y sunod niya’ng plano karon nga hingpit na siya nga molansar sa mas taas nga pwesto sa kagamhanan.

Giatngan karon sa kadaghanan kun unsa’y epekto sa iya’ng desisyon ngadto sa iya’ng karera sa boksing. Sa sayo pa, si Pacquiao namahayag nga moretiro na  siya sa boksing kun ugali’ng buligan sa maayo’ng palad nga makaangkon siya og luna sa Senado.

Sa pagkakaron, si Pacquiao padayon pa’ng nagpaalim sa iya’ng balatian human maoperahi ang tuo niya’ng abaga nga naangol samtang siya nangandam sa ila’ng superfight ni Floyd Mayweather Jr. niadto’ng Mayo 3 didto sa MGM Grand sa Las Vegas.

Gikatakda siya’ng moaway og balik sa Pebrero o dili ba kaha sa Marso sunod tuig didto sa Amerika diin daku’g posibilidad nga iya’ng makontra si British welterweight star Amir Khan. – /GMR) (BANAT NEWS)