Inahan di gawasnon sa panagmal

CEBU, Philippines - Dili gawasnon ang inahan sa kaso kung may nahimo kini’ng pagpanagmal ngadto sa iya’ng anak.

Kini sumala pa ni Atty. Noemi Abarientos sa Children’s Legal Bureau human sa insidente sa lungsod sa Daanbantayan diin usa ka bata nga lalaki gitigbas sa iya’ng inahan og kutsilyo tungod kay natulog kini atol sa ila’ng klase.

Gipasabot ni Abarientos nga ang mao’ng klase sa krimen matawag nga public crime ug kung dili interesado ang ubang paryente sa biktima nga mopasaka og kaso batok sa suspek, pwede ang polis, ubang law enforcement agencies ug social welfare ang mopasaka og kaso.

Ang biktima pwede usab mao’y mopasaka og kaso kung makadesisyon basta adunay suporta gikan sa gobiyerno.

Ang CLB nipahigayun kagahapon og team building sa Social Hall sa Kapitolyo alang sa pagprotektar sa kabataan batok sa bisan unsa nga exploitation ug pagpangabuso.

Kini kabahin sa annual conference sa Cebu Against Child Sex Tourism.

Matud niya nga ang kalihukan tubag usab sa nahitabo’ng katalagman tungod kay ang kabataan vulnerable sa exploitation.

Ang CLB naglaum nga ang ubang law enforcement agencies i-priority ang kaso sa child exploitation.

Gibutyag ni Abarientos nga sulod sa usa ka tuig, ang CLB naka-rescue og 10 ka bata gikan sa child exploitation sa dakbayan sa Bogo, Santa Fe ug Cordova.  (BANAT NEWS)