Basurahan ni JVR gisaway

CEBU, Philippines – Gisaway ni Konsehal Antonio "Jojo" Bacaltos ang basurahan nga mugna sa huna-huna ni Talisay City Mayor Johnny V. De los Reyes.

Si Bacaltos nagkanayon nga lahi ang desinyo sa basurahan nga gipakatap sa nagkalain-laing lugar sa Talisay.

Ang desinyo dili sama sa ordinaryo’ng basurahan tungod kay ang molabay og basura ang mosaka pa sa hagdan ug kini ginama sa puthaw.

Si JVR niingon nga ang basurahan gidesinyo aron dili maabot sa iro nga mokaykay sa mga basura ug momugna og kahugaw sa usa ka lugar.

Matud pa niya nga dali ra sab para sa mga basurero ang pagkuha niini ug ibalhin sa garbage truck.

Apan asoy ni Bacaltos nga daghan na’ng mga negosyante ug katawhan sa Talisay ang nipadayag sa ila’ng reklamo kabahin sa basurahan nga dos andana ang desinyo.

Nabantayan sa Banat News nga aduna gihapo'y mga basura nga anha ra sa kilid sa basurahan ibutang tungod kay kapoyan na sa pagsaka sa hagdanan labi na ang mga edaran.

Matud ni Bacaltos nga ang reklamo sa negosyante mao ang pagbutang sa basurahan duol sa ila’ng lugar diin maoy momugna og kabaho.

"Dili gyud siya friendly sa mga edaran kay mosaka-saka paman ka. Unya nindot gyud unta og matag adlaw makuha gyud na ang mga basura aron dili magpundo ug muhimo og kabaho," asoy ni Bacaltos.

Hinuon giangkon sa mayor nga aduna gyu'y nireklamo ngano’ng didto sa ila’ng lugar gibutang ang basurahan apan niklaro nga usa ra kini ug dili sila daghan.

Dugang pa niya nga wala na siya natingala nga sawayon ang iya’ng proyekto tungod kay kaatbang man sila sa politika.

Hinuon ang konsehal niingon nga unta mandoan sa mayor ang tighipos sa mga basura nga kuhaon gyud matag adlaw.

Sa naandan, palabyan pa og pila ka adlaw una pa hipuson ang basura butang nga mao’y makapahugaw sa siyudad. – /GMR) (BANAT NEWS)