Ugangan sa abogada midepensa sa anak

CEBU, Philippines – Gihimakak sa ugangan sa gipatay nga si Atty. Amelie Ocañada-Alegre ang pasangil nga ang bana niini ang mipaluyo pagbanhig sa babayeng manlalaban.

Atol sa pag-atubang ni Engr. Ramon Alegre, Jr., ugangan ni Atty. Alegre, ngadto sa media kagahapon, miasoy kini nga dili mahimo sa iyang anak nga si Ryan ang pagsugo pagpatay sa biktima.

Gihimakak sab ni Engr. Alegre ang pasangil sa kaubang manlalaban ni Atty. Alegre, Atty. Briccio Joseph Boholst, nga ang gikagubtang luna tali sa babayeng manlalaban ug ni Ryan ang hinungdan sa pagkamatay niini.

Matud sa amahang Alegre, anaa lamang sa 5,000 square meters ang gikabangiang luna nga nahimutang didto sa Talisay City.

“No property is worth taking lives for,” sigon ni Engr. Alegre.

Gitungaan na ni Ryan ug sa manghod niining babaye ang luna nga gikan sa ilang mga ginikanan.

Dugang sa ugangan sa namatay nga abogada, padayong nagsubo si Ryan ug dili pa sab kini makaatubang sa laing mga tawo. Nagsubo pa sab ang tibook nilang pamilya.

Matud niya wala pa makabisita si Ryan ug ang tibuok nilang pamilya sa haya sa abogada tungod kay nabalaka sila sa ilang seguridad.

Sumala pa niya maayo ang relasyon si Atty. Alegre ug sa ilang pamilya ug gani usa ka tuig silang magdungan og panihapon bisan nagbuwag na ang magtiayon.

Si Senior Supt. Mariano Natu-el, hepe sa Mandaue City Police Office, miingon nga palawman pa nila ang imbestigasyon.

Naangol ‘sab sila si Atty. Boholst ug empleyado nga si Antonio Pino atol sa maong pagpamanhig.

Matud ni Natu-el, upat ka anggulo ang ilang gitun-an nga maoy posibleng hinungdan sa pagbanhig kang Atty. Alegre nga naglakip sa panagbulag sa magtiayon ug ang gikagubtang luna didto sa Talisay.

Wala hinuon gibutyag ni Natu-el ang laing duha nga ilang gitun-an.

Gibutyag sab ni Natu-el nga upat ka grupo sa mamumuno ang nalambigit sa pagbanhig sa abogada base sa CCTV footage nga ilang nakuha gikan sa mga establisamento.

Gilangkoban kini og unom ka tawo, lakip na ang mipusil sa biktima ug mipasalig siya sa kaluwasan sa mga saksi nga mihatag og impormasyon bahin sa maong ambush. – /EIM) (BANAT NEWS)