Drug suspect napusilan sa polis

CEBU, Philippines - Naangol ang usa ka lalaki human nga nakigpinusilay sa mga polis nga migukod niya dihang nabulabog ang ilang pagbinaligyaay og ilegal nga drugas sa kasagbotan nga bahin sa Brgy. Upper Tutay sa lungsod sa Pinamungajan sa miaging hapon.

Ang naangol mao si Roldan Panogaling, 28, taga Tangub, Pinamungajan, samtang nasikop ang iyang katransaksyon nga si Garry Taborada, 20, nagpuyo sa nahitaboan.

Sa pasiunang imbestigasyon sa mga polis, ang duha uban sa laing mga lalaki nagbagat didto sa kasagbotan ug gitaho nga armado ug dunay transaksyon sa ilegal nga drugas.

Tungod sa maong impormasyon nagpadala og usa ka team ang police station aron sa pagsusi sa lugar apan nakabantay ang duha ug nisyagit si Panugaling og “bantay pulis” hinungdan nga mialibwag sila og panagan.

Si Panogaling gisundan ni PO2 Ariel Taguiam apan nibunot kini og armas dayong punting sa maong polis apan naunhan siya pagpusil sa naulahi ug dali dayong mitahan ug gidala sa Pinamungajan District Hospital.

Sa nanagan nga kalalakin-an, si Taborada lang ang naapsan sa mga polis ug sa pagrekisa kaniya nakuha ang upat ka gamay nga pakete nga shabu.  (BANAT NEWS)