Sungogan gipatay sa kainom

CEBU, Philippines - Patay ang usa 32- anyos nga lalaki nga gidunggab sa iyang kauban sa inom kay napungot kay sungogan kaayo  kaniya diha sa Brgy.  Lagundi,  Oslob niadtong nilabay nga gabii.

Ang namatay naila nga si Miguel Filipino, 32, taga El Pardo sa lungsod sa Boljoon, samtang ang suspetsado mao si Rory Mirasol, 38.

Matud pa ni Police Officer 2 Noel Mamali, desk officer sa Oslob Police Station, nag-inom ang managhigala kuyog sa pipila nila ka mga kaubanan, apan niabot sa punto nga naglagot si Mirasol tungod sa mga pulong nga gibuhian ni Filipino, hinungdan nga nikuha kini og kutsilyo sa kusina ug gidunggab kini.

Dali nga nisibat si Mirasol sa bukirang bahin sa Lagundi apan dali ra usab kini nasikop sa gipahigayon nga hot pursuit operation.

Giandam na karon sa kapulisan ang tukma nga kaso nga ilang ipasaka batok kang Mirasol. (Rowena Capistrano/EIM)(BANAT NEWS)