Naligsan sa pari patay

CEBU, Philippines - Andam ang Archdiocese of Cebu nga motabang sa legal nga aspeto sa gidangatan ni Fr. Joseph Gabriente, kura paroko sa usa sa mga parokya sa Aloguinsan, human kini nakadasmag patay ni Luis Esmenos, 50-anyos, taga Mambaling, dakbayan sa Sugbo kagahapon sa sayo’ng kadlawon sa may dalan Alcantara.

Matud ni Msgr. Joseph Tan, tigpamaba sa Archdiocese of Cebu, nga nakadayeg sila kang Gabriente nga wala nibiya sa iya’ng obligasyon ug dali nga gidala sa pribado nga tambalanan.

Nisurender pa gayud kini ngadto sa buhatan sa City Traffic Operations Management diin kasamtangan nga gitanggong.

Sumala pa ni Tan nga si Gabriente ang mangunay pag-abaga sa pagpahiluna sa namatay hangtud ilubong ang biktima nga karon gihaya sa usa sa mga punerarya sa siyudad.

Dugang pa ni Tan nga nagpaabot na lang sila unsa’y mosunod nga lakang nga buhaton labi na sa pamilya sa namatay.

Si Gabriente nagmaneho sa iya’ng sakyanan nga multicab ug wala siya kabantay nga duna siya’y gikasugat kay kalit ra man kaayo ang panghitabo ug itom sab ang senina sa biktima.

Samtang usa ang patay ug tulo ang angol sa managlahi’ng aksidente sa kadalanan nga nahitabo sa probinsiya sa Sugbo sa nakalabay nga adlaw.

Sa lungsod sa Carmen, duha ang nalandig sa tambalanan nga nakaangkon og mga grabeng angol sa kalawasan human usa ka motorsiklo ang nasaghiran sa Ceres Bus sa barangay Poblacion pasado alas 10 sa buntag.

Giila ang mga biktima nga sila si Tomasa Martel, 35, minyo ug Marcela Gimenez, 50, balo, pareho nga taga dakbayan sa Danao.

Samtang ang drayber sa Ceres Bus mao si Aurelio Cando, 50, minyo nga taga lungsod sa Carmen.

Gidala sa Cebu Provincial Hospital sa dakbayan sa Danao ang mga biktima samtang boluntaryo nga nitahan ang drayber sa bus.

Samtang sa lungsod sa San Fernando, patay ang drayber sa motorsiklo human nasaghiran ug nalatayan sa Isuzu flat truck sa barangay Pitalo pasado alas 7 sa nakalabay nga gabie.

Ang namatay naila nga si Benjie Baguio, 26, ulitawo nga taga dakbayan sa Toledo, samtang ang drayber sa Isuzu mao si Rene Cabeles, 35, minyo nga taga Sinsin, dakbayan sa Sugbo.

Dali pa unta nga gidala sa Carcar Provincial Hospital ang biktima apan nakabsan gyud sa kinabuhi. - /GMR (BANAT NEWS)