Papa patay, anak angol
CEBU, Philippines - Patay ang usa ka amahan ug naangol ang iyang anak human sila pamusila sa ilang kainom sa Victoria Village, Barangay Villadolid sa dakbayan sa Carcar ala-una pasado sa miaging kaadlawon.
Ang namatay naila nga si Emmanuel Lapiña, 49, ug angol sab ang iyang anak nga si Ronelito, 28, nga pulos nagpuyo sa maong lugar.
Gitumbok nga suspek sa maong kremin mao si Rodrigo Rafols II, 42, nga ilaha ra silingan.
Matud pa ni Police Officer 1 Jovani Abellanida sakop sa Carcar Police Station nga nahinabi sa Banat News, gikan nag-inom ang tulo apan nagkabikil sa wa pa masayring hinungdan.
Sigun pa ni Abellanida , ang suspek gibaharan sa mga biktima nga kulatahon maong mipauli kini sa ila ug gikuha iyang armas ug gibalikan ang mga biktima dayon gipamusil.
Tulo ka igo sa dughan ang naangkon sa amahan samtang usa ka bala sab ang miigo sa kilid sa tiyan sa anak nga milapos diin kini dali nga gidala sa Vicente Sotto Memorial Medical Center.
Nakuha sa kapulisan sa crime scene ang tulo ka basiyo sa .45 caliber pistol ug tulo ka slug, ang suspek mipauli sa ilaha ug boluntaryong mitahan sa mga polis dala ang armas nga iyang gigamit. (BANAT NEWS)
- Latest
