Bala gitutho lang

CEBU, Philippines – Giluwa lang ang bala sa usa ka lalaking napusilan sa baba diha sa Barangay Poblacion, Lungsod sa Carmen.

Ang Carmen Police Station miila sa biktima nga si Junvil Dorong, 27, taga Dawis Norte sa nahisgotang lungsod samtang wala pa mailhi kun si kinsa ang mipusil kaniya.

Matud pa  nga nakig-inom ang biktima sa iyang mga barkada sa usa ka tindahan sa maong dapit.

Giingong migawas ang biktima kay dunay paliton apan pag-abot niini sa gawas gisugat kini sa wa mailhing tawo ug gidiretso pagpusil sa iyang nawong hinungdan sa pagkaigo sa baba niini.

Human mibaliwliw ang biktima sa kakusog sa impact sa bala misibat dayon ang mamumuno.

Apan pila lang ka segundos gitutho ra sa biktima ang slug sa bala nga nakabuak sa iyang mga ngipon ug gi-turnover kini ngadto sa kapolisan.

Giingon nga nalungag ang ibabaw nga bahin sa ngabil sa biktima ug nabuak ang ngipon sa atubangan niini. Ang biktima gidala sa Danao Provincial Hospital ug dihang ilang gisukitsukit wala kini makaila sa mamumuno niya. – /EIM) (BANAT NEWS)