Gisagpa sa pulis mireklamo
CEBU, Philippines – Usa ka polis gireklamo sa usa ka drayber sa traysikol diha sa buhatan sa Toledo City Police Station tungod kay giingong gisagpa siya niini.
Si Joselito Fajardo, 39, taga Barangay Tubod, Toledo City mipasangil kang Senior Police Officer 2 Ruel Tadique nga giingong nanagpa kaniya.
Matud ni Fajardo nga samtang nagmaneho siya sa iyang traysikol sa may Poblacion diriyot magsingki ang iyang traysikol ug ang polis nga nagsakay og motor diha sa eskina nga bahin sa maong dapit.
Sumala pa sa alegasyon ni Fajardo, nanaog ang pulis nga nasuko ug giingong kalit siya nga gisagpa niini, wala makatingog si Fajardo sa gibuhat sa maong polis.
Gisuwayan unta sa Banat News pagkuha sa iyang habig si Tadique bahin sa pasangil kaniya ni Fajardo apan wala kini diha sa ilang opisina. Ang maong reklamo gipasa ngadto sa barangay level. – /EIM) (BANAT NEWS)
- Latest
