Nanigbas og sakyanan gidakop

CEBU, Philippines - Gidakop sa silingan nga sakop sa Special Weapon and Tactics (SWAT) ang usa ka tawo nga nagdala og sundang kinsa nitigbas sa nag-parking nga sakyanan sa Deca Homes Subdivision, Cubacub, dakbayan sa Mandaue alas 11 pasado ang takna sa niaging gabii.

Si Police Officer 1 Cairos Buot sa Presinto 6 sa Mandaue City Police Office (MCPO) niila sa nadakpan nga si Juanito Dy, 59-anyos, nagpuyo sa maong dapit.

Matud ni Buot nga nasuko ang suspek nga gi-parking ang sakyanan nga gipanag-iya sa magtiayun nga Carol Sanchez, 38, ug Silvirio Sanchez nga nahimutang duol sa panimalay sa suspek.

Dugang ni Buot nga wala makapugong sa kapungot ang suspek ug nagdali kini pagsulod sa ilang panimalay ug nagdala na og sundang nga 24 pulgada ang gitas-on lakip ang pul-an.

Natigbasan sa suspek ang nag-parking nga sakyanan sa biktima ug si SPO1 Jerson Rosende nga nagpuyo sa maong dapit ang dali nga nidakop niini ug gitanggong sa selda sa kapolisan. (BANAT NEWS)