“Business meet” sa motel

CEBU, Philippines - Gidakop sa bana nga polis uban sa kapolisan sa Presinto 1 sa Mandaue City Police Office (MCPO) ang usa ka sakop sa Special Weapon and Tactic (SWAT) sa Cebu City Police Office (CCPO) kinsa mi-check in kauban sa asawa niini sulod sa Jade Court Motel sa reclamation area, Dakbayan sa Mandaue.

Ang gidakop nga nagranggo og Police Officer 3, 34- anyos, taga Barangay Busay, dakbayan sa Sugbo  samtang ang midakop kaniya mao ang usa ka Police Officer 1 nga tourist police sa Lapu-Lapu City Police Office (LLCPO), apil sa gidakop ang asawa sa reklamante.

Base sa imbestigasyon, ang reklamanteng polis midangop sa Presinto 1 human nga iyang nasundan ang asawa nga miangkas sa motor sa usa ka wala mailhing lalaki ug nanulod sa maong motel. Apan sa pag-abot sa mga polis diha sa maong motel wala sila tugoti nga makasulod ug gipapaabot sila og tulo ka oras hangtud nga nanggawas ang duha ug ayha pa nila gidakop.

Apan gipanghimakak sa duha nga duna silay gihimong dautan sud sa lawak sa motel sud sa tulo ka oras. Matud pa nila, duna silay “negosyo” nga gihisgutan.

Ang duha gibuwag og priso ug pareho nang naghiram sa kabilya sa prisohan sa Presinto Uno ug sa Basak Police Station.

Ang sakop sa SWAT nga nahinabi sa Banat News mibutyag nga lima ka tuig na silang kaila sa pamilya sa reklamante ug siya pa mismo maoy mitambag sa reklamante nga sundan ang lihok sa asawa kung nagduda kini nga duna kini laing karelasyon.

Matud pa niya, atol sa ilang “business meeting” gihatagan niya og kwarta ang babaye kay matud pa molargahay kini sa Iloilo.

Samtang ang ginang miinsister usab nga negosyo ra ang ilang tuyo sa maong polis sa maong motel, matud niya ang iyaha na lang abogado maoy mohatag unya og dugang mga pamahayag. (BANAT NEWS)