Killers nadakpan

CEBU, Philippines – Duha ka lalaking nalambigit sa pagpanulis ug pagpatay og estudyanteng taga Moalboal, Cebu didto sa Sibulan, Negros Oriental mga bana sa paryente sa biktima ug nangadakpan sa ilang  pinuy-anan diha gihapon sa lungsod sa Moalboal.

Ang mga nadakpan sa Barangay Basdiot, Moalboal mao sila si Lelbe Mabanag, 37, ug Christopher Nerona, 30.  Sila maoy suspek pagdunggab patay kang Myra Abrenica Gabato, tinun-an sa Silliman University ug mibun-og ug migaid sa igsuon niini nga si Melune Abrenica Gabato.

Anggulo sa tulis ang nakitang motibo sa krimen tungod kay giingong bag-ohay lang nakadawat og kwarta ang mga biktima.

Matud pa ni Police Officer 2 Wilfredo Ando sa Moalboal Police nga nahinabi sa Banat News, nakig-alayon ang taga Sibulan Police pinangulohan sa hepe sa maong lungsod nga si Senior Inspector Antonio Detuya.

Atol sa pagsukitsukit, atubangan ni Senior Superintendent Mariano Natuel Jr., provincial police director sa Negros Oriental,  Sibulan Mayor Emmanuel Diputado, Poblacion Barangay Kapitan Dirkie Fontelo ug Atty. Gary Tabio sa Provincial Prosecutors Office, gikatahong giangkon ni Nerona nga siya maoy nagdunggab kang Myra samtang si Mabanag maoy nigapos kang Melune.

Apan si Nerona miingon nga wa niya tuyoa nga madunggaban si Myra, samtang si Mabanag miangkon nga iyang nalamba si Melune sa bungbong.

Matud pa nga nanago sa kasilyas ang duha samtang nagpaabot sa mga biktima ug dihang nakahigayon gihimo nila ang krimen ug gikuha ang P16 mil gikan sa duha ka pitaka.

Nasayran nga nakadungog ang duha sa amahan sa managsuon nga si Juan nga dunay gipadalang kwarta kang Myra aron ilukat sa gipadalang package sa fiancée niini.

Si Mayor Diputado miingon nga ang kasulbaran sa maong kaso resulta sa kooperasyon sa tanan ug gipasalig niya sa mga konstituwente nga malinawon ang ilang lungsod.

Si Natuel mibutyag nga kasong murder ug serious physical injuries ang ipasaka batok sa duha.  – Report gikan sa The Freeman/EIM) (BANAT NEWS)