Ulo, kinatawo gipangita pa
CEBU, Philippines – Love triangle ug personal nga bikil ang gitutukan sa kapolisan sa dakbayan sa Toledo nga hinungdan sa linuog nga pagpatay sa usa ka lalaki nga giputlan sa ulo ug kinatawo sa sitio Makatol, barangay Biga sa maong siyudad.
Matud ni Supt. Ricky Delelis, hepe sa Toledo City Police, nga ang pamahayag sa igsuon sa biktima ang usa sa ilang gisubay apan wala sab nila gipadaplin ang anggulo nga may personal nga gikaaway ang biktima. Subayon sa kapolisan ang rekord sa 39-anyos nga namatay nga si Alonie Olasiman nga taga lungsod sa Tuburan diin sugdan ang imbestigasyon.
Nangita usab ang kapolisan og dugang ebidensiya ug testigos sa kaso. Gipangita pa usab ang gitagoan ug gilubngan sa ulo sa biktima. “Kung makuha nato ang mga suspek posible mahibaloan nato kung asa ang ulo,” sigun pa ni Delelis.
Napalgan nga wala’y sapot ug wala na’y ulo ug kinatawo ang lawas ni Olasiman sa usa ka lungag sa maong lugar ug duha ka igsuon ang niila sa patay’ng lawas pinaagi sa bukol sa iyang tudlo. – /GMR) (BANAT NEWS)
- Latest
