Duha ka polis may reklamo sa IDMB

CEBU, Philippines – Laing opisyal sa kapolisan sa dakbayan sa Sugbo ang nag-atubang og reklamo human giingong nangulata og duha ka batan-on atol sa checkpoint sa Inayawan ug giusban pa sulod sa Pardo Police Station.

Bitbit ang medical certificate, nisang-at og reklamo sa buhatan sa Investigation and Detection Management Branch (IDMB) sila si Alexander Baritogo, 22, ug ig-agaw nga si Michael Baritogo batok kang Insp. Alvin Llamedo, deputy chief sa Pardo Police.

Asoy sa mga batan-on nga gidakop sila niadtong Oktubre 1 sa checkpoint gumikan sa wala pagsuot og helmet samtang sakay sa motorsiklo.

Giingong gihawiran ang manobela sa ilang motor hinungdan nga natumba dayon gipusasan ug gipalingkod sa patrol car ug gisumbag sa polis.

Didto sa Pardo Police Station sumala pa subling gisumbag og kaupat si Alexander una pa sila gibuhian.

Apan sa  pakighinabi sa Banat News kang Insp. Llamedo, kini mihimakak sa pasangil nga iyang gipangulata ang mga batan-on.

Matud ni Llamedo nga sila ang gibanggaan sa motorsiklo hinungdan nga ila kining gipugngan ug natumba.

Dugang ni Llamedo nga mihangyo ang duha nga dili lang sila pasakaan og kaso ug sa kalooy misugot ang mga polis human nakapakita og mga papel nga gikan kini nangita og trabaho.

"Sa akong gidak-on sir og tinuod nga ako sila'ng gisumbag na ambot lang," sigun pa ni Llamedo.

Gikatakdang mag-atubang sila sa IDMB karong Miyerkules.

Samtang kasong grave misconduct ug kasong administratiba ang atubangon sa polis nga nakapusil sa usa ka sibilyan nga gikatahong mihinol sa pribadong bahin sa iyang manghud nga babaye.

Matud sa hepe sa IDMB, Chief Insp. Aileen Recla, nga bisan matawag nga igo lang midepensa si PO2 Celso Colita sa iyang kaugalingon, dili gihapon makatarunganon sanglit wala’y dalang armas ang biktima.

Nasuta usab nga wala’y lisensiya ang .38 revolver nga gigamit sa maong polis sa pagpusil. -/GMR) (BANAT NEWS)