Pusher nakuhaan sa 11 ka armas
CEBU, Philippines - Nasikop sa kapolisan ang gitudlo nga “level 2 drug pusher” sa dakbayan sa Carcar pinasikad sa search warrant. Ang nadakpan mao si Ulric Enad, 41-anyos, taga sitio Awayan, Poblacion III, sa maong dakbayan alas 11:30 sa gabii niadtong Domingo.
Si Supt. Teodulfo Manatad, hepe sa Carcar Police ug nangulo sa operasyon, mibutyag nga halos usa ka buwan ang ilang surveillance kang Enad.
Nakuha sa kapolisan sulod sa balay ni Enad ang usa ka medium size nga gituohang drugas nga kantidad P40 mil, 13 ka linukot nga marijuana ug mga drug paraphernalia.
Gawas sa mga drugas nakuha sab sa kapolisan ang lima ka .357 revolver, lima ka .22 revolver ug usa ka .45 caliber pistol nga pulos wala’y lisensya.
Sumala pa ni Manatad nga subay sa record sa kapolisan wala sab hinuon nalambigit sa gun-for-hire o sa gun-running ang suspek apan nakabutang kini sa listahan sa kapolisan may labot sa ilegal nga drugas.
Ang mga armas nga nakuha sumala pa mga koleksiyon lang ni Enad.
Gitanggong na sa Carcar Police detention cell ang dinakpan nga gikatakdang pasakaan og kaso sa drugas ug armas. (BANAT NEWS)
- Latest
