Call center agent nalumos

CEBU, Philippines -  Patay ang usa ka call center agent nga nalumos sa pagkaligo niini og dagat nga kuyog sa iyang kauban nga nag-celebrate og birthday kagahapon sa buntag sa White Beach sa Barangay Saavedra sa lungsod sa Moalboal. Ang nalumos naila nga si Felix Paul Alquisala, 22, call center agent, molupyo sa lungsod sa Liloan.

Si PO1 Jennis Lamosao, desk officer, nga nahinabi sa Banat News miingon nga sayong buntag kagahapon naligo og dagat si Alquisala ug ang iyang mga kauban.

Uwahi nang nasayod ang mga kauban nga di diay makamaong molangoy si Alquisala ug gianod kini sa sulog. Giingong nag uwan-uwan nianang tungora ug gabaha sa maong lugar.

Gisulayan unta sa pagluwas sa iyang mga kauban si Alquisala apan nitidlom kini og kalit. Nangayo na lang sila og tabang apan dihang nakit-an si Alquisala patay na kini. (BANAT NEWS)