Kanhi city hall employee nadakpan sa buy-bust
CEBU, Philippines - Arestado sa mga sakop sa Pardo Police Station ang usa ka level 2 drug pusher nga kanhi kawani sa Cebu City Hall atol sa usa ka raid pinasikad sa usa ka search warrant sa Barangay Bulacao, Cebu City, alas 4:45 kagahapon sa kaadlawon.
Si Federick Reyes, 40, alyas Woode, kanhi trabahante sa Cebu City Hall sa Liquor Licensing Office nakuhaan og daghang drugas nga nagkantidad og P150 mil ug usa ka improvised shotgun sulod sa ilang panimalay sa Lower Sario.
Matud pa sa hepe sa Pardo Police Station nga si Chief Inspector Alexis Relado nga maoy nangulo sa maong operasyon nga ang maong dinakpan ang makabaligya og dili mominos 50 gramos nga shabu matag semana diha sa Bulacao ug mga silingan nga barangay.
Human sa positibong test buy mi-apply sila og search warrant gikan ni Regional Trial Court (RTC) Judge Soliver Peras sa Branch 10. Ang suspek gitanggong na sa detention cell sa Pardo Police Station nga mag-atubang og tukmang kaso.
Si Reyes na ang ikatulo nga drug personality nga nasikop sa kapulisan dinhi sa Sugbo sulod lang niini nga semana.
Katapusan nga nadakpan mao si Nanie Saballa, usa sab ka level 2 drug pusher nga gisignit sa City Anti-Illegal Drugs Special Operation Task Force (CAIDSOTF) nga nakuhaan og 40 mil pesos nga kantidad sa drugas.
Samtang nasikop ‘sab sa Pari-an Police Station ang duha ka mga lalaki nga nakuhaan og 20 ka ampoules sa nubain sa Barangay Kamagayan, Cebu City. Ang mga dinakpan naila nga sila si Roel Villaro, 24, ug Jay-R Bacalso, 25.
Nakuha kang Villaro ang walo ka ampoules sa nubain samtang nakuha 12 ka ampoules usab kang Bacalso. (BANAT NEWS)
- Latest
