Pagwagtang sa deputized LTO gikalipay sa mga drayber
CEBU, Philippines- Sama sa gikalipay sa mga badlungong mga drayber ang pagwagtang sa mga deputized agent sa Land Transportation Office sanglit dili na Temporary Operating Permit (TOP) ang i-isyu sa ilang kalapasan sa lagda sa trapiko.
Matud sa operation chief sa Traffic Enforcement Agency of Mandaue (TEAM), retired Col. Edwin Ermac, nga bintaha unta sa lokal nga kagamhanan sanglit makakwarta man pinaagi sa citation tickets nga i-isyu sa mga traffic enforcers.
Niadto kung TOP ang i-isyu, ang multa sa malapasong drayber adto mopaingon sa panudlanan sa LTO.
Apan sumala pa ni Ermac nga subo palandungon kay sagad sa badlongong mga drayber dili mahadlok sa citation ticket ug dili magpakabana sa pagbayad sa multa sanglit dili man kuhaon ang ilang lisensiya kung madakpan.
Si Ermac miingon nga gisuwayan na nila ang pagpasaka og kaso ngadto sa korte batok sa mga drayber nga na-isyuhan og citation ticket apan nakahatag lang og kahasol sanglit ang multa nga bayran P200 lang gihapon.
Dugang pa ni Ermac kung TOP ang i-isyu, mag-amping gyud ang mga drayber sa paghimo og kalapasan sa lagda sa trapiko. - /GMR) (BANAT NEWS)
- Latest
